ფოთის საკრებულოს წევრმა მმართველი პარტია დატოვა

2017.09.15 ავტორი: TS

ფოთის საკრებულოს სოციალურ საკითხთა კომისიის თავმჯდომარემ, მაია ჩხარტიშვილმა მმართველი პარტია დატოვა. მან ამის შესახებ განცხადება ყოფილი ფსიქიატრიული საავადმყოფოს მიმდებარე ტერიტორიაზე დღეს გააკეთა და გადაწყვეტილება ფოთში მიმდინარე არაჯანსაღ პოლიტიკურ პროცესებს დაუკავშირა.

ჩხარტიშვილის განცხადებით, ფოთის მერი ირაკლი კაკულია, ხელისუფლების სხვა მაღალჩინოსნებთან ერთად, ქალაქში მნიშვნელოვანი პროექტების განხორციელებას ეწინააღმდეგება და ხელს უშლის.

 

"ჩემი დიდი ძალისხმევით, ეს ობიექტი ეკონომიკის სამინისტრომ ქალაქს გადასცა, რათა აქ სამედიცინო დაწესებულება, ,,ემერჯენსი“ განთავსებულიყო. თუმცა, საკრებულოს ერთ-ერთ სხდომაზე შევიტყვე, რომ მისი გასხვისებაა დაგეგმილი. ამ გუნდში ჩემი ადგილი არ არის. ქალაქის კეთილდღეობისთვის ბრძოლას კი აუცილებლად გავაგრძელებ“,- განაცხადა ჩხარტიშვილმა.

 

„ბედის ირონიაა ნიკო ნიკოლაძის ქალაქს მუდამ ტენდერებზე და „ატკატებზე" მოფიქრალი კაკულია მართავდეს, რომელიც ფოთს განიხილავს პირადი კეთილდღეობის საბადოდ, ფოთელებს - საარჩევნო მასად. ის ისტორიაში შევა, როგორც ყველაზე უსუსური მერი, რომელმაც ქალაქის წინაშე არსებული ვერცერთი სტრატეგიული მნიშვნელობის პრობლემა ვერ მოაგვარა“,- განაცხადა საკრებულოს წევრმა.

 

ჩხარტიშვილის განცხადებით, მისთვის ფოთის მერობის კანდიდატი გოჩა კურდღელიაც მიუღებელია. მისი თქმით, ის ყოფილი ნაციონალია და მას მხარს არ დაუჭერს.

 

“კურდღელია ის პერსონაა რომელიც „ნაციონალური მოძრაობის“ მმართველობის პერიოდში, 2006-2010 წლებში საკრებულოში წარმოადგენდა სააკაშვილის რეჟიმის ახალაიების გაგრძელებას. ხოლო 2012 წელს სოლიდურ თანხებს სწირავდა „ნაცმოძრაობას“ სააკაშვილის რეჟიმის გადასარჩენად”, - განაცხადა ჩხარტიშვილმა.

 

ფოთის მერი და ამავდროულად, ,,ქართული ოცნების“ ფოთის საქალაქო ორგანიზაციის თავმჯდომარე ირაკლი კაკულია ბრალდებებს არ ეთანხმება. მისი განცხადებით, ჩხარტიშვილი მმართველი პარტიის წევრი არც ყოფილა და მისთვის გაუგებარია, როგორ დატოვებს ის პარტიას.

 

ჩხარტიშვილი ფოთის მერს ინფორმაციის გადმოწმებას და ცრუ ინფორმაციის გავრცელებისაგან თავშეკავებას ურჩევს. მისი თქმით, ის "ქართული ოცნება-დემოკრატიული საქართველოს“ ერთ-ერთი დამფუძნებელია.

 

მაია ჩხარტიშვილმა საკუთარ ფეისბუქ-გვერდზე განცხადებაც გაავრცელა: 

 

"მინდა გავაკეთო საგანგებო განცხადება! მე, მაია ჩხარტიშვილი, 2012 წლის იანვრიდან საზოგადოებრივი მოძრაობა „ქართული ოცნება-დემოკრატიული საქართველოს“ წევრი და ამავე პარტიის თანადამფუძნებელი, 2014 წელს ამირჩიეს ქ. ფოთის საკრებულოს წევრად, ხოლო 2015 წლის მაისიდან დღემდე ვასრულებ საკრებულოს სოც. საკითხთა კომისიის თავმჯდომარის უფლებამოსილებას.


ჩემთვის დიდი პატივი და პასუხისმგებლობა გახლდათ გასული სამი წლის განმავლობაში მემუშავა ქალაქისა და მოსახლეობის წინაშე არსებული სოციალური პრობლემების მოგვარებაზე, მაგრამ მუშაობის პროცესში შექმნილმა ხელოვნურმა ბარიერებმა დამარწმუნა, რომ დამოუკიდებლად, საერთო - გუნდური ძალისხმევის გარეშე, შეუძლებელია არსებული უმძიმესი მდგომარეობის რადიკალურად შეცვლა. თუმცა სრული პასუხისმგებლობით ვაცხადებ, მიუხედავად წინააღმდეგობებისა, მოქალაქეების წინაშე ანგარიშვალდებულების განცდა ჩემში ერთი წუთითაც არ განელებულა, ჩემი სამუშაო კაბინეტი მუდამ ღია იყო თითოეული ფოთელისთვის. ვფიქრობ, ეს არის ჩემი ყველაზე დიდი მონაპოვარი რომლის შედეგს უსაზღვრო პატივისცემისა და სიყვარულის სახით ვიმკი ყოველ ნაბიჯზე ჩემი მშობლიური ქალაქის ქუჩებში. სწორედ ეს დამოკიდებულება მანიჭებს ძალას,თქვენთან ერთად სათავეში ჩავუდგე ჩვენი ქალაქის გადარჩენის უპრეცენდენტო მაშტაბის კამპანიას,რომლის პირველ ეტაპს წარმოადგენს კაკულიასა და მისი კორუმპირებული ჯგუფის ქალაქის მართვის სადავეებიდან ჩამოშორება. ბედის ირონიაა, ნიკო ნიკოლაძის ქალაქს მუდამ „ტენდერებზე“ და „ატკატებზე“ მოფიქრალი კაკულია მართავდეს, რომელიც ფოთს განიხილავს პირადი კეთილდღეობის საბადოდ, ფოთელებს კი საარჩევნო მასად. ქალაქის უსაფრთხოება და ხალხის კეთილდღეობა კი მისთვის სრულიად უცხოა. კაკულია ქალაქის ისტორიაში შევა, როგორც ყველაზე უსუსური მერი, რომელმაც ქალაქის წინაშე არსებული ვერცერთი სტრატეგიული მნიშვნელობის ამოცანა ვერ ამოხსნა. 


დღეს, ამ სამარცხვინო ბეგრაუნდის მქონე პირი ცდილობს გახდეს მომავალი მოწვევის საკრებულოს თავმჯდომარე. პირობას ვაძლევ, ის ამ ოცნებას ვერ აისრულებს! კაკულია ვერ აცნობიერებს ქალაქში არსებულ კრიზისს, რაზეც „იმედის კვირაში“ გასულ უმძიმეს სიუჟეტში შიმშილის ზღვარზე მყოფი მოქალაქეების პრეტენზიების პასუხად მის მიერ ორწლიანი მოთმინებისკენ მოწოდების ფაქტიც ადასტურებს. 


სრული პასუხისმგებლობით ვაცხადებ,რომ არა მხოლოდ „ქართული ოცნების“, არამედ სხვა პარტიის წევრებისაგან შემდგარ ფინანსური ინტერესების მქონე ჯგუფს, რომელსაც კაკულია წარმოადგენს, არანაირი ღირებულებითი და იდეური საერთო არ გააჩნია „ქართული ოცნების“ ფასეულობებთან.


სწორედ ამ ფინანსური ინტერესების მქონე ჯგუფის გონებაში ამოტივტივდა თქვენთვის მერის თანამდებობაზე ასარჩევად შემოეთავაზებინათ ბატონი კურდღელიას კანდიდატურა,რომელიც ანგარიშვალდებულებას სწორედ ზემოაღნიშნული ინტერესთა ჯგუფის მიმართ გრძნობს, რაზეც მისი პირველი საჯარო განცხადებაც მოწმობს, რომელშიც ბრძანებს, რომ ფოთის მერიის „ერუდირებულ გუნდთან“ ერთად გეგმავს მუშაობას. ძვირფასო თანამოქალაქეებო, ეს ის „ერუდირებული გუნდია“ ,რომელიც ნეპოტიზმისა და კორუფციული ბუნების ნიშნით ჩამოაყალიბა კაკულიამ. თავისთავად ჩნდება კითხვა-უმსხვილესი კაპიტალის მქონე კურდღელიას, თუ ქალაქისა და მისი მოსახლეობის ბედი აწუხებდა, სად იყო დღემდე?! რა უშლიდა ხელს, როგორც ქველმოქმედს, დაეფინანსებინა ან განეხორციელებინა თუნდაც ერთი ინფრასტრუქტურული ან სოციალური პროექტი...


მინდა შეგახსენოთ, რომ კურდღელია ის პერსონაა, რომელიც „ნაციონალური მოძრაობის“ მართველობის პერიოდში, 2006-2010 წლებში საკრებულოში წარმოადგენდა სააკაშვილის რეჟიმის ახალაიების გაგრძელებას. ხოლო 2012 წელს სოლიდურ თანხებს წირავდა „ნაც. მოძრაობას“ სააკაშვილის რეჟიმის გადასარჩენად.


მეგობრებო, რეალობა უმძიმესია, „ქართული ოცნების“ ლოგოს ამოფარებული კლანი კაკულიას თაოსნობით ცდილობს შეინარჩუნოს ძალაუფლება, რაც დაუშვებელია ჩვენი ქალაქის მომავლისათვის. სწორედ ამ მიზნით 2012 წლის იანვრიდან საზოგადოებრივი მოძრაობა „ქართული ოცნება-დემოკრატიული საქართველოს“ წევრი და ამავე პარტიის დამფუძნებელი ვტოვებ პარტიის რიგებს და მსურს თქვენთან ერთად,„ქართული ოცნების“ პარტიული მანდატის გარეშე, ჩავუდგე სათავეში ფოთის გადარჩენის უპრეცედენტო მაშტაბის კამპანიას, რომელიც დიდ გამარჯვებამდე მიგვიყვანს. ბრძოლის ამ ურთულეს ეტაპზე დარწმუნებული ვარ, რომ ბატონი ბიძინა ივანიშვილი არ დაუშვებს ვინმეს მხრიდან რაიმე სახის ზეწოლას ჩემს ოჯახსა და თანამებრძოლებზე.


და ბოლოს, ნებისმიერი ნაციონალური ტელეკომპანიის პირდაპირ ეთერში ვიწვევ დებატებზე კაკულიას ბ-ნ კურდღელიასთან ერთად!


გმადლობთ ყურადღებისთვის!"

 

 

 

 

სტატიები
ფოტორეპორტაჟი

გამოკითხვა

რომელ კანდიდატს მისცემთ ხმას საპარლამენტო არჩევნებში?

Voted: 0

NED