ფოთის მერი - თვიმმართველობაში ჩარევის უფლება, არც პარტიას და არც მაჟორიტარს არა აქვთ[Video]

2013.06.21 ავტორი: იზა სალაყაია

ფოთის მერი დავით სარსანია TSpress -თან ინტერვიუში მაჟორიტარ ეკა ბესელიასთან არსებულ დაპირისპირებაზე საუბრობს და "ქართული ოცნების" ადგილობრივ ლიდერ ირაკლი კაკულიას ბრალდებებს პასუხობს. სარსანია ყოფილ თანაგუნდელებთან დაპირისპირების დეტალებს ასახელებს და მიაჩნია, რომ მაჟორიტარი და პარტიის ადგილობრივი ლიდერი თვითმმართველობის საქმიანობაში არ უნდა ერეოდნენ. 

-ადგილობრივი ტელეკომპანიის „მეცხრე ტალღის ეთერში ირაკლი კაკულიამ ისაუბრა დაპირისპირებაზე და „ნაციონალურ მოძრაობასთან“ გარიგებაში დაგდოთ ბრალი.

 

-პირადად მე, კაკულიასგან კონკრეტული ვერაფერი მოვისმინე, ვისურვებდი რამე კონკრეტული დაესახელებინა როგორ ვთანამშრომლობ  „ნაციონალურ მოძრაობასთან“. მან თუ ჩათვალა და იგულისხმა ის, რომ სამეგრელოს ქუჩაზე ტრაილირების მოძრაობით შეწუხებლმა მოსახლეობამ გზა გადაკეტა და ეს თუ მიუთითებს იმას, რომ მე „ნაციონალებთან“ ვთანამშრომლობ, გულწრფელად ვუთანაგრძნობ.

 

იმაზე საუბარი, რომ მე ვარ ალიანსში „ნაციონალებთან“ არაკორექტულია. ყველამ კარგად იცის თუ რა შრომა ჩავდე, ფაქტიურად ჩემი და ჩემი ოჯახის სიცოცხლე საფრთხის ქვეშ დავაყენე, როცა დავუპირისპირდი ჩვენს რეგიონში და  ქალაქში განხორციელებულ კლანურ მმართველობას. როცა ჩვენი ქვეყნისთვის გადამწყვეტი ბრძოლა იყო, სად იმყოფებოდა კაკულია, საზოგადოებას კარგად ახსოვს. (კაკულია ბოლო 4 წელი ბიზნესსაქმიანობით ყაზახეთში იმყოფებოდა-ავტ.) არც კი უკითხავს და დაინტერესებულა საქართველოში მიმდინარე მოვლენებით. ჩამოვიდა ხალხის მიერ ბრძოლის შედეგად მიღებულ გამარჯვებაზე და გამარჯვებულის პოზიციას იკავებს თან პირველ ნომრად, სასირცხვილოა, რომ ამ ყველაფრის შემდეგ, ის აკეთებს მსგავს განცხადებებს.

 

- საქართველოში არჩევნების დასრულების შემდეგ დაბრუნებულმა ირაკლი კაკულიამ მერის პოსტზე კონკურსის გამოცხადების შესახებ გააკეთა განცხადება. ის კონკურსში მონაწილეობას გეგმავდა, თუმცა მოგვიანებით აღარ მიიღო მონაწილეობა, რადაგნ ამ პოსტზე ბესელიას ფავორიტად თქვენ მოიაზრებოდით, იყო საუბარი, რომ კაკულიას კონკურსში მოანაწილეობა ბესელიამ გადააფიქრებინა, სანაცვლოდ კი პარტიის ორგანიზაციის თავმჯდომარეობა შესთავაზა. იყო ეს ერთგვარი გარიგება?

 

-როდესაც ირაკლი ჩამოვიდა საქართელოში, მიუხედავად იმისა, რომ ჩვენ ვიცოდით მისი წარსულისა და პოლიტიკური მოღვაწეობის შესახებ, ვფიქრობდით, რომ მეტ-ნაკლებად მაინც გამოგვეყენებინა მისი პოლიტიკური ხედვა და შესაძლებლობა, რაც მას გააჩნდა. მისი სურვილიც იყო და ჩვენც შევთავაზეთ, დამდგარიყო ჩვენს გვერდით. მერობაზე რამდენიმე კანდიდატურა არსებობდა, რომლებიც მონაწილეობდნენ ამ ბრძოლაში, ირაკლისაც შეეძლო მიღო კონკურსში მონაწილეობა, მაგრამ ვფიქრობ, რომ მორალური თვალსაზრისით შესაძლებელი იყო, რომ თავი შეეკავებინა. შემდეგ იყო მეორე ეტაპი ჩვენ დავუახლოვდით ერთმანეთს, მას ეს შანსი მიეცა, მე გადამწყვეტი ხმა მქონდა, მე დავთანხმდი გამხდარიყო ის პარტიის ლიდერი, თუმცა სხვა შეხედულებებიც მქონდა და გავაცანი ქალბატონ ეკას. ყოველ შემთხვევაში მოხდა ის, რაც მოხდა.

 

-ჩვენი გუნდი, ჩვენი მაჟორიტარი - კაკულია, ძირითადად ამ სიტყვებით აკეთებდა განცხადებებს. თქვენ კი ყოფილი თანაგუნდელი გიწოდათ. „ქართულ ოცნებაში“ აღარ რჩებით და ფლობენ თუ არა ცენტრალურ ოფისში აღნიშნულ დაპირისპირებაზე ინფორმაციას?

 

-ძალიან მაინტერესებს ცენტრალურ ოფისმა თუ იცოდა კაკულიას განცხადების შესახებ, თუ იყო ვინმესთან შეთანხმებული. მე, როგორც ვიცი მსგავსი შეთანხმება არ ყოფილა. სამწუხაროა, რომ ეს ასე ხდება, ყველამ იცის, რომ მე ვარ „ქართული ოცნების“ წევრი, კოალიციის შემადგენელი ნაწილი, რომელმაც ყველაფერი გავიღე, რომ გაემარჯვა „ქართულ ოცნებას“ და მომავალშიც ყველაფერს გავაკეთებ ამისათვის.

 

-რას უკავშირებთ ამ დაპირისპირებას? გარდა იმისა, რომ თქვანი ყოფილი თანაგუნდელები „ნაციონალურ მოძრაობასთან“ გარიგებაში გადანაშაულებენ და ამბობენ, რომ ქალაქში საქმეებიც არ კეთდება.

 

-პრობლემა ფაქტიურად არ არსებობს და მას ვიღაცა ძალით ქმნის, ასეთი შთაბეჭდილება მრჩება, რომ ვიღაცას ძალიან სურს, რომ ამღვრეულ წყალში ბევრი თევზი დაიჭიროს. არ ვიცი ვის აწყობს, ცუდი ხმები, ცუდი ენები... მე ირაკლის რამდენიმეჯერ ვესაუბრე და ვუთხარი, რომ მე ვარ ქალაქის ხელმძღვანელი და უბრალოდ, ვერ დავხუჭავ თვალს უსამართლობასა და უკანონობაზე. ვინც არ უნდა იყოს ის და რა რანგის ადამიანიც არ უნდა იყოს.

 

-კონკრეტულად ვის და რა უსამართლობაზე გიწევდათ "თვალის დახუჭვა"?

 

-არსებობს სხვადსხვა საკითხები, კონკრეტულად თავს შევიკავებ, მაგრამ არსებობს საკითხები, სადაც მიმაჩნია, რომ ზედმეტი ჩარევა არ არის აუცილებელი.

 

-აქ საუბარია მაჟორიტარზე?

 

-თუნდაც... ამ შემთხვევაში მე თავს შევიკავებ. როცა კოალიციის წევრები სხდებიან რაღაც საკითხზე სამსჯელოდ, შეიძლება წარმოიშვას განსხვავებული აზრი, ამიტომ მე მიმაჩნია, რომ რაც სამართლებრივად სწორია, ის უნდა მივიღოთ და უკანონობას შევეწინააღმდეგოთ.

 

-იყო საუბარი, რომ თქვენ დამოუკიდებლად ვერ იღებდით გაადწყვეტილებას და ყველა საკითხზე მითითება მაჟორიტარისგან გქონდათ. ჩვენი ინფორმაციით, თქვენს შორის ურთიერთობა დაიძაბა საკათედრო ტაძრის კურთხევის შემდეგ, კონკრეტულად, როცა თქვენ და საკრებულოს თავმჯდომარე დავით ბაბილუა სუფრაზე მოხვდით პატრიარქსა და პრეზიდენტის გვერდით, რამაც გამოიწვია ბესელიას განაწყენება და გისაყვედურათ კიდეც.  ამის შემდეგ დაიწყო თქვენს შორის დაპირისპირება?

 

-ამის შემდეგ ხომ არ წამოვიდა ის, რომ მე „ნაციოანლებთან“ ალიანსში დამადანაშაულეს? არ დავმალავ, სახეზც ეტყობოდა ქალბატონ ეკას განაწყენება. უსამოვნოდ ეჩვენა ის ფაქტი, რომ მე ვიჯექი პატრიარქის გვერდით და იმ სუფრასთან, სადაც პრეზიდენტი იჯდა. მე და დავითი (საკრებულოს თავმჯდომარე-ავტ) საერთოდ არ ვაპირებდით სუფრასთან დაჯდომას და ვთვლიდით, რომ სტუმრებისთვის, განსაკუთრებით პატრიარქისთვის ყურადღება მიგვექცია, მაგრამ ეს იყო თვითონ პატრიარქის სურვილი და კურთხევა, რომ დავმსხდარიყავით იმ სუფრაზე. ბუნებრივია, უარს ვერ ვიტყოდით...

 

-და ამ დროს მართლა მიიღეთ საყვედურიანი სმს შეტყობინება ბესელიასგან? მისი განაწყენების მიზეზი რა იყო, ის რომ რატომ დაჯექით პრეზიდენტთან ერთად და რატომ გამოელაპარკეთ თუ პატრიარქის გვერდით ჯდომა, რადგან მას უნდოდა იმ ადგილას მოხვედრა.

 

-მან არ იცოდა თუ ვისი კურთხევით მოხვდით ჩვენი იმ სუფრასთან. სიმართლე გითხართ, განაწყენების მიზეზი და რას ფიქრობს ნამდვილად არ ვიცი. პირადად კითხეთ, ალბათ თვითონ გაგცემთ პასუხს. მე არც ქალბატონ ეკასთან მაქვს დაპირისპირება, არაკონფლიქტური ადამიანი ვარ...

 

-ძირითადი პრეტენზია თქვენს მიმართ ისაა, რომ ერთპიროვნულ გაადწვეტილებებს იღებთ და არ ხდება ამის გუნდთან შეჯერება

 

-სამწუხაროა, რომ კაკულია ვერ ერკვევა მერის ფუნქციებსა და საკითხებში. როგორ შეიძლება ყოველდღიურად, როდესაც მატერიალური თუ სტაციონალური დახმარებისთვის ათობით ადამიანი მოდის მომართვით, როგორ შეიძლება ეს ერთპიროვნულად არ გადავწყვიტო? მე მაქვს პროექტები ქალაქთან მიმართებაში, ჩემი ხედვა მაქვს, რა თქმა უნდა, ვთანამშრომლობთ მაჟორიტართან, ყველას აქვს მასში შესწორების შეტანის უფლება, მაგრამ იმდენად კარგად ვასრულებთ ჩვენს მოვალეობას არა მგონია ხშირი შესწორებების შეტანა მოუწიოს ვინმეს.

 

ჩვენ გვაქვს საკრებულოსთან კარგი ურთიერთობა. წლების განმავლობაში ასეთი ჰარმონიული ურთიერთობა  მერია- საკრებულოს შორის არ ყოფილა. დღეს, ეს ურთიერთობა დარეგულირდა და ჩამოყალიბდა ერთიანი თვითმმართველობა, რაც როგორც ჩანს ვიღაცას არ აწყობს.

 

მე არ ვიცი ვინ აძლევს ირაკლი კაკულიას დავალებებს, მაგრამ  მრჩება შთაბეჭდილება, რომ ვიღაცას დალაგებულის არევა უნდა. არავინ იფიქროს, რომ ვინმეს არ ეშლება არაფერი მათ შორის შეიძლევა ქალბატონ ეკასაც ძალიან ბევრი რამ შეეშალოს, ბატონ ირაკლისაც და მეც. ჩვენ ერთმანეთს უნდა მივუთითოთ.

 

-ამ დაპირისპირებამდე თვითმმართველობის საქმიანობაში ერეოდა მაჟორიტარი? იყო საუბარი, რომ ყველა მითითებას ის გასცემდა.

 

-არ დავმალავ სხვადასხვა ფაქტები არსებობს, კონკრეტულად ახლა არ დავასახელებ... თუმცა გეტყვით, რომ არც ბიუჯეტის განხილვასა და განკარგვაში მიუღია მონაწილეობა, არც კორექტირება შეუტანია. არსებობს რაღაც საკითხები, რამაც შესაძლოა გამოიწვია ეს უთანხმოება, მაგრამ ეს არ ნიშნავს, რომ ჩვენ ვართ დაპირისპირებულები. მე ვარ კოალიციის წევრი და როგორ შეიძლება დავუპირისპირდე? შესაძლოა პიროვნებებს არ ვეთანხმებოდე კონკრეტულ საკითხებში, მაგრამ ეს კოალიციასთან დაპირისპირებას არ ნიშნავს.

 

ჯერ კიდევ საკითხავია სარსანია ვისი თანაგუნდელია და კაკულია ვისი თანაგუნდელი.

 

-იყო საუბარი, რომ მაჟორიტარი ითხოვდა მერიაში ჩატარებული ატესტაციის შედეგად დაახლოებით 150 თანამშრომელი გაგეთავისუფლებინათ, კომისიისა და თქვენი გადაწყვეტილებით კი სამსახურს 60 ადამიანი დატოვებს. იყო ბესელიასგან ან პარტიისგან მითითება/რეკომენდაცია რამდენი ადამიანი შეგემცირებინათ?

 

-თავიდანვე ქალბატონი ეკა იძახდა, რომ ჩვენ არ უნდა დავემსგავსოთ წინა ხელისუფლებას და პარტიული ნიშნით მასიური გათავისუფლებები არ უნდა არსებობდეს. „ნაციონალობის“ ნიშნით სამსახურიდან თანამშრომლების გათავისუფლებაზე განცხადებებს კაკულია აკეთებდა, რომ ხელი არ აუკანკალდება, ყველას მინუსი დავუწერე და ა.შ.

 

მერიაში მომუშავე ადამიანებმა „ქართულ ოცნებას“ მისცეს ხმა, წინააღმდეგ შემთხვევაში, იმ შედეგს ვერ მივიღებდით.

 

-თქვენ თვლით, ამ ნიშნით შესაძლებელია ადამიანების გათავისუფლება და რომ არა ეს მხარადჭერა, უფრო მეტი დატოვებდა სამსახურს?

 

-არა, რა თქმა უნდა, მე მინდა კაკულიასაც მივმართო, პარტიული ნიშნით არ შეიძლება ადამაინების დაყოფა. ნებისმიერ პოლიტიკური პარტიის წარმომადგენლის, თუ ადამიანი დამნაშავეა, ამას მიხედავენ შესაბამისი სამსახურები. თუ კაკულიას რამე ფაქტები გააჩნია, შეუძლია პირდაპირ მიმართოს სამართალდამცავებს და თუ მალავს ისიც პრობლემაა.

 

- თქვენი მისამართით გამოთქმულ ბრალდებას, წინ უძღოდა მაჟორიტარის თათბირი პარტიის წევრებთან, სადაც კაკულია მაჟორიტართან ამტკიცებდა თქვენს „ნაციონალებთან“ თანამშრომლობას. ფიქრობთ, რომ ეს იყო წინასწარ შეთანხმებული მაჟორიტართან თუ თვლით, რომ ეს კაკულიას სუბიექტური აზრია?

 

-რა საიდუმლო თათბირები იმართება არ ვიცი და არც მაინტერესებს.უამრავი საქმეა მაქვს და მისახედია ქალაქზე.

 

-კაკულიას განცხადებით, სწორედ საქმეებთნ მიმართებაში თქვენ ვერ ასრულებთ თქვენს უფლება- მოვალეობას. მაგალითად მოიყვანა სამეგრელოს ქუჩა, სადაც სატვირთო ავტომანქნების მოძრაობით შეწუხებულმა მოსახლეობამ აქცია გამართა. მისი თქმით, პრობლემა მოუგვარებელია, ასევე გზის სარემონტო სამუშოებისთვის გამოყოფილი იყო ტრანსფერი, თუმცა მისი თქმით, სამუშაოები არ სრულდება.


-აღნიშნულ პრობლემასთან დაკავშირებით, ჩვენ რამდენჯერმე შაუმდგომლობით მივმართეთ ეკონომიკისა და ტრანსპორტის სამინისტროს. ეს არის სახელმწიფო დანიშნულების გზა, გამოიყო თანხა, ტენდერი გამოცხადდა, გამოვლინდა გამარჯვებული და დაიწყო სამუშაოები. ეს არ არის ჩვენს დაქვემდებარებაში სამინისტრო თავად ახორციელებს სამუშაოებს. ზოგჯერ დამეკითხოს ხოლმე ბატონი ირაკლი, ავუხსნი და მერე გააკეთოს განცხადებები.

 

-კაკულიას განცხადებით, გეგუთის ციხეში გარდაცვლილი პატიმრის ოჯახს არ გაუწიეთ ფინანსური დახმარება


-ჩვენ ყველა შესაძლებლობა გამოვიყენეთ იმისთვის, რომ ოჯახისთვის გაგვეწია დახმარება, მათ შორის ექსპერტიზაზე მგზავრობის თანხები, მიცვალებულის სასახლე და 500 ლარის ოდენობით ფულადი დახმარება. ოჯახი, ბუნებრივია, ითხოვს უფრო მეტს, მაგრამ ჩვენ რაც კანონი ითვალსიწინებდა მაქსიმალური გავაკეთეთ, უკანონო დაფინანსებებს ვერ გავცემდით.

 

–კიდევ ერთი ბრალდება ეხებოდა კომპანია "ვისოლს", რომელსაც წინა ხელისუფლების პირობებში დადებული ხელშეკრულების თანახმად,  ყოფილი კინოთეატრის შენობის ადგილზე ახალი შენობის მშენებლობის დასრულების შემდეგ, სხვა კინოთეატრის დარბაზი უნდა მოწყობილიყო. კაკულიას თქმით, ამჟამად თქვენთან მიმდინარეობს მოლაპარაკება და თქვენი გადაწყვეტილებით კინოთეატრი აღარ მოეწყობა. ინვესტორი არ შეასრულებს ნაკისრ ვალდებულებას?

 

–არა, უბრალოდ, "ვისოლმა" შემოგვთავაზა, რომ ჩვენ შეგვეთავაზებინა სხვა შენობა, სადაც ის გააკეთებდა სარემონტო სამუშაოებს და მოაწყობდა მაღალი დონის, თანამედროვე ტექნოლოგიების კინოთეატრს, რასაც საკუთრებაში უსასყიდლოდ გადმოსცემდა თვითმმართველობას. ამ თემაზე მიდის საუბარი, ასეთ დროს ქალაქი უფრო მომგებიან პოზიციაშია. ყოფილი კინოთეატრის ადგილას კი გააკეთებს გასართობ ცენტრს. ასე, რომ შეცდომაშია შეყვანილი კაკულია, ეკითხა და ვუპასუხებდი.

 

–კაკულია ითხოვს, მსგავსი ყველა გადაწყვეტილების მიღებაში პარტია ჩართოთ, მათთან შეაჯეროთ თქვენს მიერ მისაღების გადაწყვეტილებები, რამდენად სწორად მიგაჩნიათ, პარტიის ჩართულობა თვითმმართველობის საქმიანობაში?

 

–არ ვიცი, რას გულისხმობს კაკულია ჩართულობაში, მაგრამ არ მიმაჩნია სწორად, რომ ყველაფერში ერეოდეს პარტია, შესაძლებელია, რაღაც საკითხებში აზრი დავეკითხოთ, მაგრამ თვითმმართველობა არის თვიმმართველობა, მასში ჩარევის უფლება, მმართველობაში მიიღოს მონაწილეობა, რასაც ითხოვს კაკულია არც პარტიას და არც მაჟორიტარს არა აქვთ.

 

–წინასაარჩევნო და შემდგომ პერიოდში, "ქართული ოცნება" თავის მხარდამჭერებს დასაქმებას დაპირდა, ახლა როცა კონკურსის გამოცხადებამდე დროებით მოვალეობის შემსრულებლად თქვენ ნიშნავთ კადრებს, თუ მოგთხოვათ პარტიამ ვინმესთვის რეკომენდაციის გაწევა ან სასურვველი კადრის სადმე დანიშვნა?


–ჩვენგან წაიღეს შემცირებულთა და ვაკანსიების სია, შემდეგ მითხრეს, რომ წარმოადგენდნენ საკუთარ კანდიდატურებს, მეტნაკლებად, ვფიქრობ ამ თემაზე, მაგრამ სხვებსაც უნდა მიეცეთ შესაძლებლობა მოხვდნენ ამა თუ იმ თანამდებობაზე, ამისთვის ყველაზე კარგი გზა კონკურსია. მე არ ვჩქარობ თუნდაც მოვალეობის შემსრულებლად დავნიშნო კადრები, თქვენ იცით, რომ ვიცე-მერიც ბოლო პერიოდშიც დავნიშნე, იმდენად ვფრთხილობ...

 

–3 თვის ლოდინის შემდეგ, ვიცე-მერად თქვენი მეგობრის, ლაშა კუპრეიშვილის დანიშვნით, ხომ არ დაასწარით ეკა ბესელიას საკუთარი კადრის დანიშვნა. 

 

–არ ვიცი, რამდენად ქონდა ბესელიას ამის სურვილი, მაგრამ მიმაჩნია, რომ კადრებს მაჟორიტარი კი არა, მერი უნდა ნიშნავდეს.

 

– მერად დანიშვნამდე და მას შემდეგაც, თქვენ ეკა ბესელიას მაჟორიტარობას უნიკალურ შემთხვევას უწოდებდით და აღნიშნავდით, რომ ტრანსფერის მოზიდვაში მაჟორიტარის იმედი გქონდათ. ამჟამად თქვენს შორის არსებული დაპირისპირება ხომ არ შუშლის ხელს ქალაქის საქმეებს, თუნდაც ფინანსების მოზიდვის კუთხით? ირაკლი კაკულია აცხადებდა, რომ არიან ინვესტორები, მაგრამ თქვენს გამო ვერ ხერხდება განხორციელება. მისი თქმით, მან და ბიუროს წარმომადგენლებმა გამართეს ინვესტორებთან შეხვედრები. 


–ეს ყველაფრი თითიდან გამოწოვილი სისულელეა...არ ვიცი, ვინ ინვესტორები იყვნენ ჩამოსულები, მაგრამ ჩემი ინფორმაციით, ისინი შეხვდნენ. ეს თუ ასეა, სირცხვილია, თუ ინვესტორი მოდის ბუნებრივია ქალაქის ხელმძღვანელობა, მერი, საკრებულოს თავმჯდომარე უნდა შეხვდეს მას. თუ ვინმე ბუტიაობას აგრძელებს, ეს მათი პრობლემაა.

 

– ანუ მსგავსი ქმედებებით მათი მხრიდანა ქვს ხელშეშლას ადგილი, რომ პარტიისა და ბიუროს ხელმძღვანელობა მასპინძლობს ინვესტორს და ხელისუფლებამდე არ უშვებს?

 

–კი. რა შუაშია ბიუროს და პარტიის ხელმძღვანელი ინვესტორთან? ქალბატონ ეკა ბესელიას როლი  არის ძალიან მნიშვნელოვანი სხვადასხვა საკითხებში. ინვესტორის და თუნდაც ფინანსების, ტრანსფერების მიღება მხოლოდ მაჟორიტარზე არ უნდა იყოს დამოკიდებული. ჩვენ ვთანამშრომლობთ ფინანსთა, ეკონომიკისა და რეგიონული განვითარების სამინისტროსთან. მისი როლი მნიშვნელოვანია, მაგრამ მაინცდამაინც თვითმმართველობა დამოკიდებული არ უნდა იყოს მაჟორიტარზე. მას აქვს სხვა ძალიან მნიშვნელოვანი საქმეები ქალაქთან და იგივე კანონებთან მიმართებაში.

 

სტატიები
ფოტორეპორტაჟი

გამოკითხვა

რომელ კანდიდატს მისცემთ ხმას საპარლამენტო არჩევნებში?

Voted: 0

NED