„სააკაშვილი მზადაა, გახდეს აბსოლუტური დიქტატორი, ოღონდ მას არ აქვს ამის რესურსები“

2012.02.27 ავტორი: ელისო ჯანაშია

ინტერვიუ ბიძინა ივანიშვილთან


საკუთარ ეკონომიკურ ხედვებზე, დევნილების პრობლემებსა და მოქალაქეთა სოციალურ მდგომარეობაზე, მოძალადე პოლიციელებსა და არჩევნების გამყალბებლებზე, საკუთარ პოლიტიკურ გეგმებსა და საქართველოს პერსპექტივებზე, აქამდე უცნობი რაკურსით, ექსკლუზიურად tspress.ge-ს მკითხველისთვის. ჩვენს კითხვებს პასუხობს „ქართული ოცნების“ლიდერი, ბიძინა ივანიშვილი:

 

ბიძინა ივანიშვილი

- ბატონო ბიძინა, რომელი მედიასაშუალებებიდან ახერხებთ სამეგრელოს შესახებ ინფორმაციის მიღებას?

 

- მედიასაშუალებების გაცნობას, ძირითადად, ვახერხებ მედიამონიტორინგის სამსახურის მიერ მოწოდებული მასალებიდან. რაც შეეხება სამეგრელოს, აქ განსაკუთრებულ დეფიციტს ვგრძნობ ობიექტური მედიის თვალსაზრისით. სამეგრელოს რეგიონი, თავისუფალი მედიის მხრივ, ყველაზე მეტად არის შეზღუდული. ეს ძალიან სამწუხაროა.

 

ეს პრობლემა ახლო მომავალში, ჩვენი ხელისუფლებაში მოსვლისთანავე, უნდა გამოვასწოროთ. ახლაც უნდა შევეცადოთ, სამეგრელოს რეგიონი არჩევნების პერიოდში როგორმე გავააქტიუროთ, რათა მედიაგამოცემები არ განიცდიდნენ ცენზურას, მოსახლეობამ ობიექტური ინფორმაციის მიღება მოახერხოს და კარგად ინფორმირებული არჩევანის გაკეთება შეძლოს.

 

-  უკვე რამდენიმე თვეა, პოლიტიკაში ხართ. რა განსხვავებაა ბიზნესმენ ივანიშვილსა და პოლიტიკოს ივანიშვილს შორის?

 

- ბიზნესსა და პოლიტიკას შორის  ბევრი რამ არის საერთო. ორივეს სჭირდება კადრების სწორად შერჩევა, სწორი მენეჯმენტი,  რისკების სწორად გათვლა, დროული რეაგირება. რაც საერთო არ არის მათ შორის, ეს საჯაროობაა. გაგიმხელთ და გეტყვით, რომ ეს ჩემი სამუშაოს ის ნაწილია, რა ამასთან შეგუება გამიჭირდა, თუმცა, პოლიტიკაში ყოფნა ბუნებრივად გულისხმობს საჯაროობას. გარკვეული დროის შემდეგ,  ცხოვრების ამ წესსაც შევეჩვიე.

 

-არჩევნების თემა დღეს ძალიან აქტუალურია. პრაქტიკულად, უკვე ვართ საარჩევნო რეჟიმში, ხელისუფლება უკვე უამრავ წინასაარჩენო ღონისძიებას გვთავაზობს...ამასთან, გამკაცრდა პარტიების დაფინანსების კანონი, არაა დაზუსტებული სიები, ხელისუფლებას თავად ხელი მიუწვდება ადმინისტრაციულ რესურსზე, აკონტროლებს სამ ნაციონალურ არხს და ა.შ. რას დაუპირისპირებთ ამ ყველაფერს და გამარჯვების შემთხვევაში, რა შედეგი ჩაითვლება თქვენთვის დამაკმაყოფილებელ შედეგად?  

 

- არჩევნებში გამარჯვებად მივიჩნევთ დამაჯერებელ გამარჯვებას და არა 1-2%-ით მეტი ადგილის მოპოვებას. ჩვენ, კოალიცია არჩევნებში უნდა ავცდეთ 2/3-ს. ამ უსამართლო და უთანასწორო  საარჩევნო გარემოში ეს რთულია, მაგრამ შესაძლებელი. ყველაფერს გავაკეთებთ იმისათვის, რომ დამაჯერებელ გამარჯვებას მივაღწიოთ.


რაც შეეხება ხელისუფლების მიერ დაწყებულ წინასაარჩევნო აგიტაციას, ადმინისტრაციული რესურსების გამოყენებას, პროსახელისუფლებო ნაციონალურ ტელევიზიებსა და მის სხვა უპირატესობებს, ჩვენ ამას მარტივი წესით დავაბალანსებთ - ხელისუფლების რეალურ სახეს დღეს ჩვენი მოსახლეობა ძალიან კარგად ხედავს. გასაგებია ის ძირითადი მეთოდი, რითაც  ისინი არჩევნების მოგებას აპირებენ: ესაა სიცრუე, ძალადობა და უკანონობა. საარჩევნო გარემოს გასაჯანსაღებლად საჭიროა, ადამიანებს ჰქონდეთ ინფორმირებული არჩევანის გაკეთების საშუალება. ამ დროს არსებობს ინფორმაციის სიმწირე, განსაკუთრებით - რეგიონებში. ჩვენ ვიწყებთ ამ პრობლემის გამოსწორებაზე მუშაობას და ფოსტალიონების ინსტიტუტის აღდგენა რომ დაგვჭირდეს კიდეც, თითოეულ მოსახლემდე ობიექტური ინფორმაციის მიტანას მაინც მოვახერხებთ.

 

რაც მთავარია, ჩვენ გვაქვს ამისათვის სხვადასხვა მექანიზმი, სხვადასხვა გათვლა. მხედველობაში მაქვს იმ შეზღუდვების განეიტრალება, რასაც ადმინისტრაციული და სხვა უკანონო რესურსებით ხელისუფლება ახერხებს. საბაჟოზე გვიფუჭებენ აპარატურას. „მაესტროს“ - პრაქტიკულად, ერთადერთ საინფორმაციო საშუალებას, რომელიც მთელ საქართველოზე თანამგზავრის საშუალებით მაუწყებლობდა, დაუმტვრიეს გადამცემი აპარატურა.

 

რეგიონების მოსახლეობა პრაქტიკულად  ვეღარ იღებს ობიექტურ ინფორმაციას. ფაქტობრივად, მუშაობს სამი სახელისუფლებო ტელევიზია, თუ მხედველობაში არ მივიღებთ პატარა არხებს, რომლებიც დიდი წნეხის ქვეშ არსებობენ.  მხედველობაში მაქვს რეგიონული ტელევიზიები: 25-ე არხი ბათუმში და „თრიალეთი“ - ქართლში. გვაქვს ასევე გაზეთი „ქართული ოცნება“, რომელიც მოახერხებს საზოგადოების ინფორმირებას.

 

-  ვფიქრობ, რომ ყველაზე დიდი მოთხოვნა დღეს არის პირადად თქვენთან შეხვედრაზე. მოსახლეობას სურს, თავად შეხვდეს ბიძინა ივანიშვილს და დაელაპარაკოს. ჩახვალთ თუ არა რეგიონებში და როდის?

 

-  რა თქმა უნდა, ამას აუცილებლად გავაკეთებთ.  ხალხთან შეხვედრასაც ორგანიზება და მომზადება სჭირდება. მე  კოალიციის პრეზენტაციაზე განვაცხადე, რომ მარტის ბოლომდე მოვახერხებთ პარტიული სტრუქტურების ჩამოყალიბებას.  1 აპრილიდან გავაქტიურდებით: მე და ჩემი კოლეგები გავალთ ყველა რეგიონში იმდენჯერ, რამდენჯერაც ეს საჭირო იქნება და მოსახლეობის პრობლემებს უშუალოდ გავეცნობით.

 

- საზოგადოების ერთი ნაწილი ფიქრობს, რომ თქვენი გუნდის პოლიტიკური გააქტიურება ჭიანურდება.


- ვერ დაგეთანხმებით. ინტენსიურად ვმუშაობთ. არის რაღაც, რაც ზედაპირზე არ ჩანს, მაგრამ საჭიროა შეხვედრები პოლიტიკურ ისტებლიშმენტთან, უცხოელ პარტნიორებთან. მოგეხსენებათ, რომ ხალხი შეშინებულია, არის ძალიან დიდი ზეწოლა. ბევრ ადამიანს  ნათესავი ჰყავს დაჭერილი და პირობით გათავისუფლებული. მათ სურთ ჩვენთან თანამშრომლობა, მაგრამ ღიად გამოჩენას ერიდებიან.

 

ხელისუფლებას მრავალი მექანიზმი აქვს ჩადებული იმისთვის, რომ ხალხი როგორმე არ გააქტიურდეს. თუმცა, ისინი ვერ ითვალისწინებენ მთავარს: არ იციან ქართველი კაცის ხასიათი, რომელიც მებრძოლი და  თავისუფლების მაძებარია. ხელისუფლება, დიდი ძალადობისა და წინააღმდეგობის მიუხედავად, რა თქმა უნდა, ვერ მოახერხებს, ბრძოლისა და გამარჯვების სურვილი დაგვიკარგოს. ჩვენ ვვითარდებით, თუმცა, ხელოვნური პრობლემების გამო ვკარგავთ იმაზე ცოტა მეტ დროს, ვიდრე ნორმალურ სიტუაციაში დავკარგავდით.

 

უამრავ პრობლემას ხელოვნურად გვიქმნიან. განსაკუთრებით, ეს იგრძნობა რეგიონული ოფისების გახსნისას. კაცს დაითანხმებ, ოფისს დაიქირავებ, იწყებ მუშაობას. მერე ამას შეიტყობს ხელისუფლება და მეორე დღესვე ხორციელდება ამ ადამიანზე ზეწოლა. შედეგად, ძალიან ხშირად, ისინი უარს ამბობენ ჩვენს შტაბში მუშაობასა თუ ოფისის გაქირავებაზე.

 

- ასეთ ადამიანებთან შემდგომ როგორი დამოკიდებულება გაქვთ: თუ ხვდებით ან თუ უწევთ რაიმე სახის იურიდიულ დახმარებას? რას უპირისპირებთ ხელისუფლების ძალადობას ამ ეტაპზე, რადგან ეს ადამიანები მართლა ძალიან დაზარალებული არიან.


- დღეს ჩვენ ვერ ვახერხებთ, საქართველოს მოსახლეობის იდეალურად დაცვას. მაგრამ ეს ნაბიჯ-ნაბიჯ გასაკეთებელი საქმეა. თანდათანობით ვგეგმავთ საზოგადოების გააქტიურებასა და შიშისგან გათავისუფლებას. სურვილის მიუხედავად, ყველა ნაბიჯის შესახებ დეტალურად ვერ მოგიყვებით, რადგან ზოგი რამ საიდუმლო ჩანაფიქრიცაა. მაგრამ ეს მოხდება დროულად. აპრილიდან, ჩვენი მობილიზება თვალშისაცემი იქნება. ზედმეტი გააქტიურება, შეიძლება დღეს საჭირო არც იყოს, რადგან ამ ეტაპზე ძალიან აგრესიულია ხელისუფლება. ეს კი, უპირველესად, ჩვენს მომხრეებს დააზარალებს. ამას მაქსიმალურად ვერიდებით.

 

- თქვენ ზედმეტად არ აქტიურობთ, მაგრამ აბსოლუტურად სხვა სურათია ხელისუფლებაში, რომელიც ჰიპერაქტიურია...


- დიახ,  ჰიპერაქტიური პრეზიდენტი გვყავს... ჩემი აზრით, ცოტა ისტერიულად დარბის. თუმცა, სირბილით ბევრს ვერაფერს მოიპოვებს. ყველამ იცის უკვე, რომ მასთან შეხედრაზე ხალხი ავტობუსებით დაჰყავთ; ყველამ იცის, რომ ზოგიერთ შენობას, სხვადასხვა დროს, სამი მხრიდან ხსნის. გაუგებარია, ვისთვის და რისთვის აკეთებს ამას. ალბათ, თვითონვე უხარია ეს, მოსწონს და ვერ ჩერდება, ვერ ისვენებს... აქვს ილუზია, რომ კახეთიდან იმერეთს მოატყუებს, იმერეთიდან - სამეგრელოს, საერთო ჯამში, შექმნის ილუზიას, რომ ის აღმაშენებელი პრეზიდენტია. თუმცა, ძირითადი აქცენტი მაინც გაკეთებული აქვს არა თუნდაც მოჩვენებით აღმშენებლობაზე, არამედ ისევ დაშინებაზე, ძალადობასა და გაყალბებაზე და ჰგონია, რომ ამ მანიპულირებით მოახერხებს არჩევნების მოგებას. მაგრამ გარწმუნებთ, რომ არაფერი გამოუვა. ეს მყიფე სისტემა დაიმსხვრევა და ყველაფერს დაერქმევა საკუთარი სახელი.

 

- რადგან პრეზიდენტი ახსენეთ, იქნებ, მასზე ვისაუბროთ. რა მიგაჩნიათ მის ყველაზე დიდი მარცხად და ყველაზე დიდი მიღწევად მოღვაწეობის მანძილზე?


- ვფიქრობ, რომ ყველაზე კარგად რაც ისწავლა ამ ხელისუფლებამ (რასაც მისი წინამორბედი ვერ ახერხებდა), არის ის, თუ როგორ მოაგროვონ ფული. ეს პროცესი დაიწყო საბაჟოებიდან და ახლა ყველა მოქალაქის ჯიბეში ძვრებიან. იციან, ვის რამდენი აქვს ჯიბეში და ამის მიხედვით ამყარებენ მასთან ურთიერთობას. ეს, ნახევრადხუმრობით, რა თქმა უნდა...

 

ყველაზე დიდი მიღწევა, რითაც დღესაც ტრაბახობენ, ისაა, რომ ელექტროენერგია გვაქვს. იმაზე აღარ საუბრობენ, რომ ამ დენს საქართველოს მოსახლეობა  ევროპაში, მგონი, ყველაზე ძვირად ყიდულობს. საოცარია, რა მექანიზმით მიაბეს მოხმარებული ელექტროენერგიის საფასურს ნაგვის გადასახადი. პრეზიდენტი იმით ტრაბახობს, რომ დაბნელებული ქვეყანა გაანათეს. თუკი კარგად გავაანალიზებთ, ჩვენი ქვეყნის მოქალაქეებს, მათი შემოსავლების ფონზე, ეს რა დაუჯდათ და რა უჯდებათ, მივხვდებით, რომ ესაა კატასტროფა. ასეთი ძვირი ელექტროენერგია, ბევრი მიზეზის გამო, მათ შორის - იმის გამოც,  რომ მისი გამომუშავების უდიდესი ნაწილი ჰიდრორესურსებზე მოდის, საქართველოში არ უნდა ღირდეს.

 

რაც შეეხება რეალურ მიღწევას, რასაც მე ქართველი ხალხის და არა - ხელისუფლების მიღწევად მივიჩნევ, პოლიციაში, ქვედა დონეზე კორუფციის დამარცხებაა. ამას აუცილებლად აღვნიშნავ ხოლმე უცხოელ ჟურნალისტებთანაც, რათა ხაზი გავუსვა ქართველი ხალხის კულტურას _ როგორ მოახერხა ათი ათასობით ქართველმა პოლიციელმა, ასე სწრაფად, უარი ეთქვა კორუფციაზე.

მაგრამ ეს სააკაშვილის დამსახურება არ არის. რაღაც ეტაპზე, მას ამას მიღწევად მეც ვუთვლიდი, მაგრამ ეს არ არის განსაკუთრებული მენეჯმენტის შედეგი. თუმცა, მერაბიშვილი ცუდი მენეჯერი არ არის (ეს რამდენჯერმე მითქვამს), მაგრამ ამ თვალსაზრისით, ის გამორჩეული არ არის.  ეს პოზიტიური შედეგი (ასე მცირე დროში) მხოლოდ ქართველი ხალხის კულტურის განსაკუთრებულობას შეიძლება დავუკავშიროთ.

 

თუმცა, ეს მიღწევა გადაფარა იმ გარემოებამ, რომ დღევანდელი პოლიცია მთლიანად პოლიტიზირებულია და პრაქტიკულად, მხოლოდ ერთი კაცის დაკვეთას ემსახურება. მე ისევ ვაქებ ათიათასობით ქართველს, რომელიც დღეს პოლიციაში მსახურობს. ისინი პატიოსანი ადამიანები არიან, მაგრამ ერთი კაცის ძალადობის გამო ვერ ახერხებენ, ღირსეულად შეასრულონ თავიანთი მოვალეობა, ემსახურონ საზოგადოებას, ხალხს და არა - ხელისუფლებას. მათაც ხშირად უწევთ კანონსაწინააღმდეგო ქმედების ჩადენა, თუმცა ამის სურვილი მათ აბსოლუტურ უმრავლესობას არ გააჩნია.


რაც შეეხება მეორე წარმატებულ რეფორმას, ეს იყო განათლების რეფორმის ნაწილი.  მთლიანად, განათლების სფეროში კატასტროფული მდგომარეობაა - ისევე, როგორც დღეს საქართველოში, ნებისმიერ დარგშია. მაგრამ მისაღები გამოცდების სისტემა, რომელიც მუდმივი სირცხვილი იყო ჩვენი მოსახლეობისთვის, შეიცვალა. ამ სფეროშიც, როგორც კი ხელისუფლებამ რაღაც პოზიტიური შედეგი მიიღო, ძალიან მალე, მოსახლეობამაც გამოხატა, ასევე, პოზიტიური დამოკიდებულება. გამოდის, რომ როგორც კი ხელისუფლება სწორი გზის ჩვენებას შეეცდება, საქართველოს მოსახლეობას აქვს ძალიან დიდი მზაობა რეფორმებისა და სამართლიანობის მიმართ. თუმცა, როგორც ვიცი, დღეს ამ წარმატებული რეფორმის საერთოდ გაუქმებას აპირებენ.

წარუმატებლობების ჩამოსათვლელად კი, ალბათ, ერთი დღე არ გვეყოფა. პირველ რიგში, სააკაშვილის უდიერი და გაუაზრებელი ქცევით დაკარგული ტერიტორიები უნდა გავიხსენოთ,  ხელისუფლების კონტროლქვეშ არსებული სასამართლო, მედია. ყველაზე ცუდი კი ისაა, რომ დღეს სააკაშვილი მზადაა, გახდეს აბსოლუტური დიქტატორი, ოღონდ მას არა აქვს ამის რესურსები.


- სააკაშვილმა პოლიციის რეფორმა მასობრივი გათავისუფლებებით დაიწყო. თქვენ საუბრობთ პოლიციელების პოლიტიზირებაზე, რაც მიგაჩნიათ ამ სფეროს სერიოზულ ნაკლად. ხელისუფლებაში მოსვლის შეთხვევაში, დაითხოვთ თუ არა პოლიციელებს, ანუ რა ბედი ელით ვანო მერაბიშვილის პოლიციელებს?


- ვისაუბრებ არა მხოლოდ პოლიციელებზე, არამედ საჯარო მოხელეებზეც. სულ რამდენიმე დღე დასჭირდება და პოლიციამ, ისევე, როგორც სწრაფად თქვა უარი კორუფციაზე,  სწრაფად იტყვის უარს პოლიტიკური დაკვეთების შეასრულებაზე და სწრაფად ჩადგება კანონიერების სამსახურში. ეს რეფორმა, თავის დროზე, ხელისუფლებამ დიდი ტკივილების ხარჯზე, არასწორად ჩაატარა - ძალიან ბევრი პროფესიონალი აბსოლუტურად დაუმსახურებლად გააძევეს სამსახურიდან. ისევ მინდა, ხაზი გავუსვა ქართველი ხალხის კულტურასა და მაღალ ზნეობას: მათ მოახერხეს, სწორი პოზიციის დაეჭირათ.

 

ხელისუფლებაში ჩვენი მოსვლის შემდეგ, საჯარო მოხელეების აბსოლუტური უმრავლესობა შეინარჩუნებს სამუშაო ადგილებს. უფრო მეტს გეტყვით -  არსებული ხელისუფლების დარჩენის შემთხვევაში, მათ სამუშაოს დაკარგვის საფრთხე ემუქრებათ, ვინაიდან მართვის ასეთი მეთოდებით ხელისუფლება ძალიან მალე ვეღარ შეძლებს ამდენი საჯარო მოხელის შენახვას. რომ არა ჩვენი გუნდი და ჩვენი  შემოსვლა პოლიტიკაში, სულ მალე ისინი ამ ხალხს ხელფასებს ვერ გადაუხდიან. მე არ მჯერა მათ მიერ ოფიციალურად წარმოდგენილი ციფრების. ვიცი, როგორი ბიუჯეტი დაგვხვდება ჩვენ - აბსოლუტურად დანგრეული და განადგურებული. დარწმუნებული ვარ, ჩვენ რომ არ მოვიდეთ პოლიტიკაში, მაქსიმუმ, კიდევ ერთი წლის განმავლობაში თუ მოახერხებენ ამ რაოდენობის საჯარო მოხელის შენახვას.

 

საჯარო მოხელეებს მინდა, შევახსენო: ნუ აქვთ იმის შიში. ხელისუფლებაში ჩვენი მოსვლის შედეგად, ისინი სამუშაო ადგილებს არ დაკარგავენ. პირიქით, ჩვენი მოსვლის შემდეგ, მათ გაუჩნდებათ  საფუძველი, არათუ შეინარჩუნონ, არამედ გაიუმჯობესონ მდგომარეობა. სწორი პოლიტიკის გატარების პირობებში, მათი სახელფასო განაკვეთებიც გაიზრდება. ეს შეეხებათ პოლიციელებსაც და სხვა საჯარო მოხელეებსაც.

 

- თუ გაქვთ გადაწყვეტილი, ვინ იქნებიან თქვენი კოალიციიდან პრეზიდენტობის, პრემიერ-მინისტრობისა და პარლამენტის თავმჯდომარეობის კანდიდატები?


- შემიძლია, განვაცხადო, რომ პრემიერ-მინისტრი ვიქნები მე. ეს გადაწყვეტილია და ეს იციან ჩემმა კოლეგებმა და გუნდის წევრებმაც. რაც შეეხება სხვა თანამდებობებს, მე ვფიქრობ, ჯერ ამის გაცხადება ჯერ ნაადრევია. ყველაფერი თავის დროზე გაირკვევა.

 

- თქვენს გუნდში არიან შევარდნაძის სახეები. ასევე არის მოსაზრებაც, რომ თქვენს გუნდში არ არიან დასავლეთში განათლებამიღებული ადამიანები. გარკვეულწილად ხომ არ მოქმედებს ეს თქვენი გუნდის რეიტინგზე და ხომ არ გიკარგავთ მომხრეებს?


- რაც შეეხება შევარდნაძის გუნდის წევრებს, ტლევიზიები ძალიან ხშირად საუბრობენ თედო ჯაფარიძესთან დაკავშირებით. მიმაჩნია, რომ თუკი ჩვენი ახალი პარტიის ნებისმიერ წევრს ცალ-ცალკე განვიხილავთ, ისინი უმაღლესი კლასის პროფესიონალები არიან.

 

პირიქით, კარგია, როცა ადამიანს  გამოცდილება აქვს. ჩვენი გუნდის  წევრთა ძირითადი მახასიათებელი, პროფესიონალიზმის გარდა,  პრინციპულობაა. ჩვენთან ახალი სახეებიც არიან: მაგალითად, ირაკლი ღარიბაშვილი საფრანგეთში, სორბონის უნივერსიტეტში სწავლობდა. ასევე, დავითაშვილი გახლავთ ატლანტის უნივერსიტეტის პროფესორი. ვცდილობთ, ახალი სახეებიც გვყავდეს და ძველი, გამოცდილი სახეებიც. ჩვენს გუნდში არავინაა და არც მომავალში იქნება ისეთი ადამიანი, ვისაც წარსულიდან გამოყოლილი  სერიოზული შეცდომა ამძიმებს.

 

- თქვენს ადრინდელ გამოსვლებში აღნიშნავდით, რომ აღმოფხვრიდით უმუშევრობის პრობლემას. კონკრეტულად რა ნაბიჯებს გადადგამთ ამისათვის?


- უმუშევრობის მიზეზი ის პოლიტიკაა, რომელსაც დღევანდელი ხელისუფლება ახორციელებს. ესაა მონოპოლიური ბიზნესის არსებობა, რომელსაც ხელისუფლება მფარველობს და რომელიც  მაღალ ფასებს განაპირობებს. ეს არის მაგალითი იმისა, თუ როგორი არ უნდა იყოს ეკონომიკა; მიუთითებს იმაზე, თუ რა შემთხვევაშია მოსალოდნელი დიდი უმუშევრობა და ეკონომიკის ნგრევა.

 

პირველ რიგში, კანონიერება და მართლმსაჯულება უნდა აღდგეს, მედია და ბიზნესი უნდა გათავისუფლდეს სახელმწიფო ჩარევისა და მონოპოლიზებისგან. სწორი ეკონომიკური კანონებით რეალურადაა შესაძლებელი, შეიქმნას საინტერესო საინვესტიციო გარემო, ჩაიდოს ფული საქართველოს ეკონომიკაში, გაიხსნას ახალი საწარმოები, შეიქმნას ახალი სამუშაო ადგილები და ა.შ.

 

ბიძინა ივანიშვილთან ინტერვიუზე

- სახელმწიფო ხომ ვერ შექმნის ახალ საწარმოებს, როგორ წარმოგიდგენიათ ამის გაკეთება?

 

- რა თქმა უნდა, ეს არ არის სახელმწიფოს საქმე. ამას ფიქრობს სააკაშვილი მუდმივად - რომ თითქოს მან უნდა გახსნას ობიექტები; დარბის, მუდამ ამით ამაყობს  და თვითონ მიიწერს, რომ ის ხსნის საწარმოებს თუ სამედიცინო დაწესებულებებს. ეს არ არის ხელისუფალის, საჯარო მოხელის საქმე. მათი საქმეა, შექმნან რეალური გარემო ბიზნესისათვის და კანონიერება აღდგეს ქვეყანაში. ყველაზე ცუდი, რაც ანგრევს და რეალურად, პერსპექტივას უკარგავს  ბიზნესს, არის ის, რომ სახელმწიფო ჩინოვნიკი და, მათ შორის, პრეზიდენტი კერძო ბიზნესში ერევა. ანტიმონოპოლიური სამსახური რეალურად უნდა მუშაობდეს. 

 

დღეს, ბიზნესი მთლიანად მონოპოლიზებულია და მართულია სახელმწიფოს მიერ - იგი საოცარ წნეხს განიცდის. შემიძლია ძალიან კარგი მაგალითი მოგიყვანოთ, რაზეც დღეს ელჩებთან შეხვედრაზეც ვისაუბრე: იცით, როგორი უკანონობა ჩაიდინეს „ქართუ ბანკის“ წინააღმდეგ. ბანკებზე პოლიციური ზედამხედველობის თვალსაზრისით, ისეთი კანონი შემოიღეს, რომ ასეთ პირობებში ბანკების არსებობა შეუძლებელია. მიუხედავად ამისა, როდესაც ჩვენ კომერციული ბანკების ასოციაცია მოვიწვიეთ, წარმოიდგინეთ, რომ შეკრებაზე არც ერთი ბანკის წარმომადგენელი არ მოვიდა. იმდენად დაშანტაჟებული, დაშინებულია და მართულია ბიზნესი, რომ შეკრებაზე მოსვლა ვერც ერთმა კომერციულმა ბანკმა ვერ გაბედა. არადა, ამ კანონით ნებისმიერი ბანკი შეუძლიათ, ხვალ და ზეგ გააკოტრონ. აქ რამდენიმე ადამიანის მიერ იმართება ყველაფერი.

 

პროკურორ ადეიშვილს აქვს შექმნილი რაღაც მონიტორინგის ჯგუფი, რომელიც აკონტროლებს ნებისმიერ გადარიცხვას და რეალურად, ყველა ბიზნესს. ასეთია სინამდვილე: საქართველოში ბიზნესების მართვას პროკურორი ახორციელებს. სრული პასუხისმგებლობით ვამბობ, რომ ამ პირობებში ვერც ბიზნესი განვითარდება და ვერც სამუშაო ადგილები შეიქმნება.

 


- მაინც რომელი გადასახადი მიგაჩნიათ ყველაზე უსამართლოდ?


- გადასახადების დახვეწა და დარეგულირება ყველაზე მარტივი პროცესია. მთავარი ისაა, რომ ხალხს არა აქვს შემოსავალი და ნებისმიერი, დიდი თუ პატარა გადასახადი, დღეს უკვე პრობლემაა საქართველოს მოსახლეობისთვის. ყველაზე დიდ გადასახადებს, დღეს, საპროცესო გარიგებების გზით კრეფენ. სწორედ ამის გამო მოხდა მოსახლეობის მასობრივი გაკოტრება. დღეს ყველანაირი ბიზნესი განუზომელ ზეწოლას განიცდის. საგადასახადო წნეხის დარეგულირება იქნება ძალიან მარტივი; მთავარი ის არის, რომ ბიზნესში ხელისუფლების ჩარევა არ უნდა ხდებოდეს და სამართლიანი კანონები უნდა იყოს. ბიზნესს განვითარებისთვის მაქსიმალური პირობები უნდა შევუქმნათ.  საჭიროა ძალიან დაბალგანაკვეთიანი ან უპროცენტო სესხების გაცემა წვრილი და საშუალო ბიზნესისთვის და ა. შ.

 

- მონოპოლიების დაშლას როგორ აპირებთ? სახელმწიფომ რა უნდა გააკეთოს ამისათვის? თავის დროზე, ამ ხელისუფლებასაც  თითქოს ჰქონდა ამის მცდელობა, მაგრამ, როგორც აღმოჩნდა, ვერ განახორციელეს...


- ამ ხელისუფლებას, პირიქით, ჰქონდა მონოპოლიების შექმნის მცდელობა და შექმნეს კიდეც. ანტიმონოპოლიური სამსახური - აბსოლუტურად შენგებულად - საერთოდ გააუქმეს. დღევანდელ საკანონმდებლო ბაზაში ბევრი არაფერია შესაცვლელი; მისი შესრულების ნება უნდა არსებობდეს. ანტიმონოპოლიური სამსახური რეალურად უნდა მუშაობდეს. კანონი უნდა კანონობდეს. მონოპოლიური ბიზნესის, ასე ვთქვათ, „ჭკუაზე მოყვანა“, კონკურენტული გარემოს შექმნას შეუძლია.

 

- გასაგებია, რომ მხარს გიჭერთ საზოგადოების ოპოზიციურად განწყობილი ნაწილი, მაგრამ თუ გავითვალისწინებთ იმ ფაქტს, რომ ნაცმოძრაობა ჯერ არაა გაკოტრებული პარტია და მას ყავს გარკვეული რაოდენობის ამომრჩეველი, რითი აპირებთ მისი მომხრეების გადმობირებას, რას შესთავაზებთ მათ ან რას გააკეთებთ ისეთს, რომ მათი მხარდაჭერა მოიპოვოთ?


- საქართველოს მოსახლეობის დაახლოებით 1/3 არის მკვეთრად ოპოზიციურად განწყობილი ელექტორატი. მე რომ არ ვიყო კიდეც, რომელიმე ოპოზიციურ ძალას ის მხარს მაინც დაუჭერს. 1/3 გახლავთ ხელისუფლებაში დასაქმებული და დაშინებული ამომრჩეველი.  არსებობს აზრი, რომ ეს ადამიანები მხარს უჭერენ ხელისუფლებას, 1/3 კი ვერ, ან - არ ბედავს პოზიციის გამოხატვას. დღეს საქართველოში ძალიან ცოტა თუ დარჩა, რომელიც რეალობას ვერ აცნობიერებს. ამ ხელისუფლების საპირისპიროდ, ჩვენ მათ ვთავაზობთ: სიცრუის ნაცვლად - სიმართლესა და კანონიერებას. ხელისუფლების უკანონობასა და ძალადობას ვუპირისპირებთ კანონიერებას, თავისუფლებასა და პერსპექტივას.

 

ჩვენ არც თუ ისე ბევრი გვაქვს გასაკეთებელი. არც თუ ისე დიდი გმირობა სჭირდებათ ამომრჩევლებს. ჩვენ მათგან არ ვითხოვთ რაიმე მსხვერპლს, წინასწარ პოზიციის გამოხატვას. უბრალოდ, ისინი უნდა გამოვიდნენ საარჩევნო უბანში და მოხაზული ბიულეტენი ჩააგდონ საარჩევნო ყუთში. ეს არ არის დიდი გმირობა, ჩვენ ამას მოვახერხებთ.  რა თქმა უნდა, იმას, რომ მათ დაიჯერონ ჩვენი უპირატესობა და ის, რომ უკეთეს მომავალს ვთავაზობთ, სჭირდება მუშაობა.


არ არიან ქართველები ასეთი მშიშრები, როგორიც სააკაშვილს ჰგონია. მას ჰგონია, რომ საზოგადოების დაშინებული ნაწილი არ გამოვა სახლებიდან და მის მაგივრად, თავად მისცემენ ხმას. ასეთი  დიდი ისტორიის მქონე ქართველები არც ისეთი მშიშრები ვართ, რომ არჩევნების დღეს სახლებიდან გამოსვლა ვერ მოვახერხოთ.

 

- სამეგრელოში ბევრი დევნილი ცხოვრობს, რომლებიც არაადამიანური მეთოდებით გაასახლეს თბილისიდან. მათ რას ჰპირდებით?

- ისინი მსხვერპლნი არიან იმ დიდი უსამართლობის, რაც ჩვენს ქვეყანაში ხდება. მათ უამრავი გაჭირვება და პირადი ტრაგედია გადაიტანეს. ერთ რამეს შევპირდები ჩვენს დევნილებს: ინდივიდუალურად განვიხილავთ ყველა დევნილის საკითხს და მათი სურვილისა და ჩვენი შესაძლებლობების მაქსიმალური გათვალისწინებით მოვახერხებთ მათთვის ადამიანური ცხოვრების პირობების შექმნას. ჩვენთვის მთავარი ადამიანი და მასზე დაფუძნებული ფასეულობებია.

 

- თქვენი ოპონენტები მუდმივად აპელირებენ იმაზე, რომ თქვენ არ გქონიათ საქართველოში ბიზნესი, თუ არ ჩავთვლით "ქართუ ბანკს" და არ ჩაგიდიათ თანხა საქართველოს ეკონომიკის განვითარებაში. მართლაც, რატომ მოხდა ასე?


- პირველი სტრუქტურა, რომელიც საქართველოში გავხსენი, იყო „ქართუ ბანკი“. მაშინაც ვაცხადებდი და დღესაც ვამბობ, რომ მისი დანიშნულება საქართველოში ინვესტიციების ჩადება და საინვესტიციო პროექტების დაფინანსება იყო. ყველანაირ შეღავათებს ვპირდებოდი საზოგადოებას და ვაპირებდი, მთელი ჩემი კაპიტალი  საქართველოში საინვესტიციო კლიმატის გაუმჯობესებისა  და ინვესტიციების ჩადებისთვის გამომეყენებინა. „ქართუ ბანკი“ იყო პირველი სტრუქტურა და არა - საქველმოქმედო ფონდი.

 

პირველი დღიდან მოყოლებული, „ქართუ ბანკმა“ საქართველოს ეკონომიკაში 300 მილიონის ინვესტირება მოახერხა. იმდენად, რამდენადაც აქ არ არის საინვესტიციო კლიმატი, არ არის მოთხოვნილება ფულზე, როგორი საოცრებაც არ უნდა იყოს. რაღაც ეტაპზე, ბანკის ხელმძღვანელობას დავავალე, იქნებ, საკრედიტო განაკვეთი შეგვემცირებინა და მინიმუმამდე დაგვეყვანა, ვინაიდან პრობლემის მიზეზად მაღალი პროცენტები მივიჩნიე. მაგრამ ანალიზის შემდეგ დამარწმუნეს, რომ ეს შეუძლებელი იყო, რადგან ერთადერთი, რაც კარგად ფუნქციონირებდა საქართველოში, ეს იყო საბანკო-საფინანსო სისტემა, და თუ ჩვენ განაკვეთს ხელოვნურად დავწევდით, ეს სხვა კომერციული ბანკების გაკოტრებას გამოიწვევდა. მე საკუთარი კაპიტალი შემომქონდა და მარტო დაბანდებისთვის მქონდა ეს ყველაფერი განკუთვნილი. მაგრამ არ მოხერხდა, არ არის ამაზე მოთხოვნილება...

 

ყველაზე საინტერესო ბიზნესისათვის - რაც ქვეყანას სჭირდება - ეს არის ფული. ეს ფული უნდა გაიცეს მოსახლეობაზე დაბალი პროცენტებით, ეს ეკონომიკის განვითარებისთვის ერთ-ერთი ძირითადი ფაქტორია. ამ მხრივ, ყველაზე დიდი შესაძლებლობები გვქონდა, რათა საინვესტიციო ბანკი ვყოფილიყავით; შეუზღუდავი დაფინანსება შეგვეძლო, მაგრამ ეს არ მოხერხდა.

 

- ზოგადად, თავისუფალ ეკონომიკურ ზონებზე რას ფიქრობთ და ხელისუფლებაში მოსვლის შემთხვევაში, ზონებთან დაკავშირებით რა გადაწყვეტილებას მიიღებთ?


- საქართველოში არ უნდა იყოს ერთი გამორჩეული ზონა. ყველა ზონა უნდა ფუნქციონირებდეს და ყველგან უნდა იყოს რეალური თვითმმართველობა, კარგად გამართული პოლიტიკა და კარგი ეკონომიკური კანონები. ამის საფუძველზე უნდა განვითარდეს ყველა რეგიონი.


რაც შეეხება ფოთს და მასთან მიმართებით პრეზიდენტის დაპირებებს: რა თქმა უნდა, ეს მორიგი სიცრუეა. ზოგადად, თავისუფალ ეკონომიკურ ზონებზე უკვე უარს ამბობს განვითარებული ევროპა, ძველი ევროპა და კვიპროსიც კი, რომელსაც, ევროკავშირში გასაერთიანებლად, ოფშორულ და თავისუფალ ეკონომიკურ ზონებზე უარი ათქმევინეს. ეს იყო პრეზიდენტის მორიგი სიცრუე, მორიგი ტრიუკი - ლაზიკის მშენებლობის მსგავსად, სადაც ერთ კაცი წყვეტს, აშენდეს თუ არა ახალი ქალაქი, დაშრეს თუ არა ჭაობები. ამ დროს, უამრავი სახლი დაცლილია, მათ შორის, სამეგრელოშიც. ხალხი სამუშაოდ უცხოეთში  გარბის, რაც  ხელისუფლების პოლიტიკის შედეგია. ვინ უნდა იცხოვროს იმ ახალ ქალაქში, ვის უნდა ეს და რატომ უნდა გადაწყვიტოს ეს ყველაფერი ერთმა კაცმა?

 

- თქვენ ერთ ინტერვიუში განაცხადეთ, რომ სააკაშვილს ჯერ კიდევ გააჩნია რესურსი, რომ ხალხმა მას მიუტევოს. რას გულისხმობდით?


- ერთადერთი სწორი გზა, რაც სააკაშვილს დარჩა, არის ის, რომ რაც შეიძლება სწრაფად შეჩერდეს. ასეთ შემთხვევაში, შეიძლება საქართველოს მოსახლეობამ მიუტევოს - უამრავი შეცდომისა და დანაშაულის მიუხედავად.


- მოსახლეობას აინტერესებს ასევე, ხომ არ გააუარესებს თქვენი მოსვლა მათ მდგომარეობას კრიმინალური და სოციალური კუთხით, ექნებათ თუ არა მათ შუქი, გაზი...კანონიერი ქურდების მიმართ შეცვლით თუ არა პოლიტიკას?


- არავითარ შემთხვევაში. პირიქით, დღეს კრიმინალიც, ქურდიცა და მოძალადეც ჩვენი ხელისუფლებაა - სააკაშვილის მეთაურობით. ჩვენ ამას აღმოვფხვრით და ეს იქნება ძალიან მარტივი გასაკეთებელი. ის მოსახლეობის შეცდომაში შეყვანას ცდილობს. ვარწმუნებ ქართულ საზოგადოებას, რომ კრიმინალური მდგომარეობა არც ერთ შემთხვევაში, არ გაუარესდება; პირიქით, გაუმჯობესდება.

 

- ხელისუფლებაში თქვენი მოსვლის შემთხვევაში დაისჯებიან თუ არ არჩევნების გამყალბებლები? ამის პრეცედენტი არ ყოფილა აქამდე: აყალბებდნენ შევარდნაძის პერიოდში, აყალბებენ სააკაშვილის პერიოდში, მაგრამ გრძელდება დაუსჯელობის სინდრომი...


- დაუსჯელობის სინდრომი მუდმივად უბიძგებს შემდგომ ხელისუფალს ასეთივე დარღვევისკენ. რა თქმა უნდა, ქვეყანაში უკვე რამდენი წელიწადია, სამართლიანობა არ არსებობს და, პრაქტიკულად, არავინ ისჯება. უფრო მეტიც, ისჯებიან ისინიც, ვისაც არაფერი დაუშავებია. დღეს უამრავი უკანონო პატიმარი გვყავს.

 

ჩვენ მოვახერხებთ ქვეყანაში სამართლიანობის აღდგენას. საქართველოს მოსახლეობას ვპირდები, რომ დაისჯება ყველა ის პირი, ვინც დაარღვევს კანონს და მონაწილეობას მიიღებს არჩევნების გაყალბებაში. ამის პრეცედენტი საქართველოში შეიქმნება. ეს ჩემი მხრიდან გაფრთხილებაცაა და თხოვნაც, რომ დაემორჩილონ მხოლოდ კანონს და არა - ხელისუფლების მხრიდან გაყალბების უკანონო მოწოდებას.

 

- საქართველო არის ნატოს ის არაწევრი ქვეყანა, რომელსაც ყველაზე მეტი სამხედრო ჰყავს ავღანეთში. ხელისუფლებაში თქვენი მოსვლის შემთხვევაში რას აპირებთ: გაზრდით თუ შეამცირებთ ამ კონტინგენტს?


- ჩვენთვის საამაყო უნდა იყოს პარტნიორობა ისეთ სახელმწიფოებთან, როგორიც გახლავთ ამერიკის შეერთებული შტატები და ნატო-ს წევრი სხვა სახელწიფოები. ჩვენმა ქვეყანამ უნდა შეძლოს, ღირსეულად შეასრულოს ის მისია, რასაც ეს პარტნიორობა ავალებს. კონკრეტულად სამხედრო კონტიგენტის გაზრდის ან შემცირების საჭიროებას განვიხილავთ, მაგრამ ევროატლანტიკურ სივრცისკენ ლტოლვას ჩვენ არ შევაჩერებთ, პირიქით, გავაძლიერებთ და დავაჩქარებთ.  ჩვენ ამ პარტნიორობას დიდ პატივს ვცემთ და მომავალში მის გაღრმავებას შევეცდებით.

 

მადლობა ინტერვიუსთვის.

 

ესაუბრა ელისო ჯანაშია

 

 

ინტერვიუს ჩანაწერს tspress.ge ხვალ შემოგთავაზებთ

 

 

სტატიები
ფოტორეპორტაჟი

გამოკითხვა

რომელ კანდიდატს მისცემთ ხმას საპარლამენტო არჩევნებში?

Voted: 0

NED